မင်းလိုတဲ့အခါ
ဘယ်အရာမဆို
ငါအဆင်သင့်ဖြစ်ခဲ့ဖူးတယ်.....
မင်းငိုတဲ့အခါ
စိတ်ဒဏ်ရာတွေ ဖြေလျှော့ဖို့
ပုခုံးလေးအဆင်သင့်
ရော့အင့်လို့ ထိုးပေးခဲ့ဖူးတယ်......
ချစ်သူနဲ့ ရန်ဖြစ်လို့
မင်းစိတ်ညစ်တဲ့အခါ
စိတ်ပြေလက်ပျောက်ဖြစ်ဖို့
မင်းရစ်သမျှ သီးခံရင်း
ငါ့နှလုံးသားတစ်စုံခင်းလို့
မင်းချနင်းစေခဲ့ဖူးတယ်...
မင်းစိတ်ရူးပေါက်တိုင်း
စိတ်ကူးယဉ်ဇာတ်လမ်းတွေ
တစ်ပုဒ်ပြီးတစ်ပုဒ်
မင်းလုပ်ကြံပြီးပြောတဲ့အခါ
မငြီးမငြူ နားတွေမပူစတမ်း
ထိုင်နားထောင်ပေးခဲ့ဖူးတယ်...
မင်းချစ်သူနဲ့ အဆင်ပြေသွားလို့
ငါ့ကိုမေ့လျှော့သွားတဲ့အချိန်မှာ
တိတ်တိတ်ကလေးနဲ့
ဆိတ်ငြိမ်စွာနေထိုင်ရင်း
ငါမုန်းတဲ့ နာရီသံတွေကို
ရေတွက်နေခဲ့ဖူးတယ်...
ငါ့ဘက်ကို တစ်ချက်မှ လှည့်မကြည့်သူရယ်လို့
တစ်ကြိမ်မှ မတွေးမိခဲ့သလို
ဖြည့်ဆည်းပေးနေရတဲ့
ဒီဝဋ်ဒုက္ခချိုချိုကိုမှ တပ်မက်နေမိတဲ့ငါ
ဝေဒနာတွေ မိုးမလင်းနိုင်အောင်
သန်းခေါင်ထက် ညဉ့်နက်ခဲ့တာ
ကြာပြီပဲလေ..
Subscribe to:
Post Comments (Atom)
No comments:
Post a Comment